Í byrjun nóvember samþykkti Alþingi lög er vörðuðu annars vegar svokallaða tekjufallsstyrki og hins vegar áframhald lokunarstyrkja. Skatturinn fer með framkvæmd laganna og verður opnað fyrir umsóknir á næstu dögum.
Hafir þú orðið fyrir miklu tekjufalli vegna áhrifa heimsfaraldurs kórónuveiru eða aðgerða stjórnvalda bendum við þér á að skoða neðangreint. Þá megum við til með að benda þér á reiknilíkan vegna tekjufallsstyrkja sem aðgengilegt er hér á vefnum, en því er ætlað að aðstoða lesendur að meta áhrifa laganna á sinn rekstur.
Tekjufallsstyrkir
Tekjufallsstyrkjum er ætlað að styðja við rekstraraðila sem hafa orðið fyrir tímabundnu tekjufalli vegna heimsfaraldurs kórónuveiru og aðgerða stjórnvalda til að verjast útbreiðslu hennar. Í upphafi var hugmyndin að tekjufallsstyrkjum til styrktar litlum rekstraraðilum og einyrkjum en við meðferð Alþingis voru fleiri rekstraraðilar felldir undir gildissvið laganna. Tekjufallsstyrkirnir eru veittir fyrir allt að fimm stöðugildi á hvern rekstraraðila og tekur styrkfjárhæð mið af rekstrarkostnaði og tekjufalli. Tekjufallsstyrkur gagnast því sérstaklega smærri rekstraraðilum og getur styrkurinn numið allt að 17,5 m.kr. á rekstraraðila.
Skilyrði fyrir veitingu styrksins eru sem hér segir:
- Lögaðili hafi byrjað rekstur fyrir 1. apríl 2020.
- Tekjur lögaðila á tímabilinu 1. apríl til 31. október 2020 voru a.m.k. 40% lægri en meðaltekjur hans á sjö mánaða tímabili 2019 og tekjufallið má rekja til heimsfaraldurs kórónuveiru eða ráðstafana stjórnvalda til að verjast útbreiðslu hennar.
- Skil á opinberum gjöldum (sköttum og sektum) og álagning byggist ekki á áætlunum vegna vanskila á skattframtölum og skýrslum til Skattsins síðast liðin þrjú ár áður en umsókn berst. Ársreikningum hafi verið skilað o.fl.
- Lögaðili hefur ekki verið tekinn til slita eða bú hans til gjaldþrotaskipta.
Fjárhæð tekjufallsstyrks skal vera jafnhá rekstrarkostnaði rekstraraðila á tímabilinu 1. apríl til 31. október 2020. Tekjufallsstyrkur getur þó aldrei numið hærri fjárhæð en sem nemur tekjufalli rekstraraðila. Tekjufallsstyrkur fyrir hvern almanaksmánuð á tímabilinu 1. apríl til 31. október getur jafnframt aldrei orðið hærri en:
- 400 þús. kr. fyrir hvert mánaðarlegt stöðugildi hjá rekstraraðila á tímabilinu og ekki hærri en 2 millj. kr. enda sé tekjufall rekstraraðila á bilinu 40–70%.
- 500 þús. kr. fyrir hvert mánaðarlegt stöðugildi hjá rekstraraðila á tímabilinu og ekki hærri en 2,5 millj. kr. enda sé tekjufall rekstraraðila meira en 70%.
Þá ber að nefna að:
- Hafi rekstraraðili hlotið stuðning úr ríkissjóði vegna greiðslu hluta launakostnaðar á uppsagnarfresti samkvæmt lögum nr. 50/2020 á tímabilinu 1. apríl til 31. október 2020 skal hann draga fjárhæð þess stuðnings frá rekstrarkostnaði skv. 1. málsl. 1. mgr.
- Hafi rekstraraðila verið ákvarðaður lokunarstyrkur samkvæmt lögum um fjárstuðning til minni rekstraraðila vegna heimsfaraldurs kórónuveiru dregst hann frá tekjufallsstyrk.
Gert er ráð fyrir að Skatturinn geti byrjað að taka á móti umsóknum í desember en umsókn um tekjufallsstyrk þarf að berast fyrir 1. maí 2021.
Áframhald lokunarstyrkja
Áframhald lokunarstyrkja, sem kynntir voru til leiks í „fyrstu bylgju“ heimsfaraldursins hér á landi, voru samþykkt af Alþingi vegna þeirrar bylgju er nú ríður yfir. Aðilar sem gert var að loka samkomustað eða láta af starfsemi eða þjónustu tímabundið vegna ákvarðana heilbrigðisráðherra um takmörkun á samkomum og tóku gildi 18. september 2020 eða síðar, eiga rétt á styrknum uppfylli þeir frekari skilyrði laga nr. 38/2020 um fjárstuðning til minni rekstraraðila vegna heimsfaraldurs kórónuveiru.
Frekari skilyrði fyrir veitingu styrksins eru sem hér segir:
- Tekjur skulu vera a.m.k. 75% lægri á lokunartímabili en á jafnlöngu tímabili í næstu heilu almanaksmánuðum á undan þar sem ekki kom til lokunar eða stöðvunar starfsemi eða þjónustu.
- Skil á opinberum gjöldum (sköttum) hafi verið í lagi og hafi verið það sl. þrjú ár. Ársreikningum hafi verið skilað o.fl.
- Lögaðili hefur ekki verið tekinn til slita eða bú hans til gjaldþrotaskipta.
Fjármála- og efnahagsráðuneytið hefur boðað nýtt úrræði, Viðspyrnustyrki, sem er ætlað að veita rekstrarstuðning fram á næsta ár, sem einskonar framhald á tekjufallstyrkjum. Gera má ráð fyrir að drög að því frumvarpi verði lagt fram á næstu dögum.
